Imos marchando....l'esprito d'as piedras.

En plegando en a frontera Oeste dica o rafe ye tiempo de meter-ie as leras y , de vez, as chamineras de tosca que encara no i son mesas . Asinas que caleba avantar en fer bell peirón, capiscol, espantabruxas ( Clamar-lo como queratz) pa eschorruntar qualque mal esprito de ixos que fan a tana quan yes mas espiguardau. No tiengo garra ideya de picar piedra ni medios pa fer-lo como cal pero manifaciando un poquet he farchau un moñaquet mirandose-se a-sabe-lo que embabiecato as estrelas.

Tamién he picau una enreligada solar ( Lauburu - cuatro cabezas- en euskera) que me parixeba un elemento prou conoxito en l'Alto Aragón, anque agora emplegato más que más en E.H. do ye un icono bien plazentero.
Estoi que no empacha zarrapita ni meya reconoxer con goyo a cercanía, mesmo en yeranos o mesmos, cultural con l'antigo pueblo vascón que dixó en a toponimia y folklore d'istas montanyas tantas venas d'a mesma radiz. Con tot e con ixo dixo a historia a qui sepa mas que no yo.

A o canto d´a enreligada i meso YST que parixe estar l'antigo nombre de Yeste ( YST..DIEST...YESTE ). He leyiu que tien una etimología que nos leva a "claridad" "luminosidad" y bien puede estar ya que Yeste ye o zaguer lugar d'a val en do se pone o sol . Cuan a resta d'a val en o lusco ya ye fosca Yeste encara s'amuestra bien vistera embolicada en a zaguera luz d'a tardi.

Tamién dizir que o día 27/11/19 o escudo, picau fa ya buen borguil de días por Jose Juan, ya ye acoflato en o suyo puesto pa cutio, que asinas bi siga con l'aduya D.M. del buen implaz d'os tiempos.