OS ECOS, SIENTE...

No quereba dixar este blog  sin bella dentrada en luenga aragonesa que ye a que se sintió entre estos espazios desentos agora a rebutir soque de silenzios. 

Foi servir grafía ofizial y EFA atras vegadas, encara que a la fin tendré de dezidir-me....soque estoi que as dos valen.

A casa, bien plazentera en o cobalto d’o lugar, ascuitó a l’arreu asabelas cuantas cheneracions de charradors d’ista luenga de fumo. Manimenos ixas parolas no han dixau guaire rastro zafumau d’o suyo alentar por estas enruenas que ue no fan ni tartir. As trazas de expresar-se d’estas chens y o lugar s’acotoloron de vez, abocinadas cuentra o nuevo tiempo que ya acucutaba. Con tot y con ixo, si fas orella a la usma de l’aragonés d’esta redolada, ascape pararás cuenta de que bella cosa en queda, más que más en a “intimidá” de cualques corrinches.Encara bi'n ha parolas o diziendas que continan en a parla viva y atras con o retrai d'ista viella luenga agora por esviellar.

GARONETA, GORGOCHA, ESCALETE, LA CHORRA, FUENFRÍA...UNA VAL PLENA DE TOPÓNIMOS ENRELIGAUS CON A LUENGA ARAGONESA.

 Os fuegos s’amortón, os paretazos s’emboldregón y a luenga s’acotolo sin que garra chen podise fer ni zarrapita ni meya, asinas que os quefers agora parixen desinformes…a mirar enta debán , a la marcheta y china chana  que ye como lo tiempo se zangarria por aquí. Aquí somos asperando que s'esbrozen as endrezeras que cal pa fer un aragonés estandar de compleganza pa fer zeprén tots de conchunta.Caldrá arroclar-se en ista faina que lo preto l'ivierno ya truca y zeprena de firme.

 Ixo no quita pon pa que seamos en un puesto de firme tradizión lingüistica aragonesa,  arodiaus por as más visteras y guallardas fablas de l’aragones occidental y en bel meyo d’a suya arremetida por a dignidá y reconoximiento.

 Asinas que, por chusticia con a nuestra cultura aragonesa y con a enchaquia d’esferder-la, escomencipiaremos a recontar-ie cosetas de Yeste y d’a suya redolada en esta luenga, no siga que a la fín s’apoque de raso. Atamás de buenacosa de chen ya sería en o fosal bien enterrecada asinas que imos a fer un poder por fer-la reviscolar, o millor revilcar porque ya lo tiempo cuasi la ha muerto. En o camín nos trovaremos un poquer desentos cualques veces, menos solencos que no parixe atras, enzertando-nos a cruzar con chent con conzienzia lingüística… treballar a tornachunta pa fer buena güebra.

FOZ D'ESCALETE. CUAN TE LA MIRAS VININDO-TE-NE DENDE O SUR.

Ye por ixo que imos a embrecar-nos en a presencia de l’aragonés en tot o que faigamos pa amostrar y aponderar o prochecto de Casa Ger como cal.

Ye o nuestro compromís y nos femos contentos d’emprender-lo, contamos con tu .
 Que tos faiga goyo…y tos prebe bien.

Nota : A grafía que femos servir ye una rechira que querebanos estiese a consonante con a nueva grafía de consenso que agora ye en cantareta. Bien puede estar que no siga que o blinco d’o zapo, asinas que no tos en faigaz , disculpaz as errors que podamos aber-ne meso. No en tenemos mica sustanzia .